بیز

 

بوش خیاللار کؤلگه سینده

اوست اؤرتولو فریلداقلار بؤلگه سینده

بو گونلرین یابان دؤشدن امیزدیریب

یارینلارین ساتانلارین  جرگه سینده

آج گؤزلرین یاریشیندا

سؤزجوکلرین بوش توپونون آتیشیندا

وطن وطن دئیب    وطن ساتانلار چوخ

اؤزلوگونو  کیملیگینی   آتانلار چوخ

 

کور دوشونجه دوستاقیندا

دیاز سؤزلر یاتاقیندا

ترس آرزونون  باتاقیندا

اؤزلرینی  به یه ننلر

دونن بو گون    یارین

اؤزون  حق بیلنلر

ائل آدینا یاد کوپوندن 

قارا قازانج  گؤزله ینلر

یالنیز نیفرت

آنجاق  کینه بسله ینلر

سئوگی نه دیر بیلمه ینلر

نغمه لری چئینه ینلر

اؤزلریندن باشقاسینی  سئوه نمزلر

گرچکلری اویغودادا  گؤره نمزلر

 

 

 

 

قایالار تک باشی اوجا

آنلی آچیق چیپلاق اولماق

باهار اوچون یارپاق اولماق

وطن اوچون تورپاق اولماق

دیری دیری ائل یولوندا سس سیز اؤلماق

نئجه اولار بیلنمزلر

گؤزللیگی اؤینمزلر

 

بیز سئوگیدن یولا چیخان

کدورته قالخان توتان

آیدینلیغا میدان قوران

اؤزگه لیکده اؤزه دؤنن

کؤنوللرده بسته له نیب

قوپوزلاردا سؤزه دؤنن

ائل گولنده چیچکله نیب

بنفشه نرگیزه دؤنن

سئوگیمیزه   عهدیمیزه صادیق لریک

حسرتینده یاندیقیمیز آزادلیقا عاشیق لریک

 

های کوی دگیل ایستگیمیز   دیلگیمیز

سارسیلمایان محبّتله چرپنیری اوره گیمیز

 

یوردوموزون تارلاسیندا   دنه دولان  سنبللرین

اؤز گولونه نغمه دئین  بولبوللرین

اؤز یوردونا  بزک اولان

کردی کردی  چیچکلرین   گوللرین

            هارایی دیر بو هارای

             نغمه سیدیر بو نغمه

 

 

 

 

 

ده ده قورقود  سؤزو واردیر  بو سؤزده

کوراوغلونون هارایی وار بو سسده

فضولونون   نسیمی نین    شهریارین

                      نفسی وار بو نفسده

 

بابکلرین بایراغی دیر بو بایراق

ستارخانین سنگری دیر بو دوراق

تومروس آنامدان قالیبدیر  بو قونداق

اودلار یوردودور بو تورپاق

آذربایجانیندیر  بو چراغ

کیم به ینمیرسه دورسون ایراق

کیم بیزی سئویرسه بویورسون قوناق

 

بیز اویدورما ناغیللاردا

دیبدن یالان یازیلاردا

باشقالارین کوچوتمکله

اؤزوموزه احسن دئییب  ال چالمیریق

اولونمایان دویوشلرین ظفرینی  کوی سالمیریق

قوی سئوگیدن    صداقتدن  اوره گی بوش            

جیبی دولو  یادلار قولو  اولانلارین

گؤزونده بیز  یابان اولاق   گونده بیر آدلا آدلاناق

 

 

 

 

 

 

 

 

 

 

قارمالانان قاپیمیزین   بوشلوغوندا

یاشیللانیب  قوجا چینار

یوردوموزون  سئوگیسیله

کونلوموزده چیچکله نیر نازلی باهار

آرزوموزون اوفوقونده اوچوشوللار  قارانقوشلار

                                             قاطار قاطار

دیله گلیر بایاتیلار   گرایلیلار

تئللی سازلار   گنج اوزانلار

بیز سئوگیدن یولا چیخان

کدورته  قالخان توتان

محبّته میدان قوران

ائلیمیزن   یوردوموزون

               سئوگیسینده  صادیق لریک

             حسرتینده یاندیقیمیز آزادلیقا عاشیق لریک     

 

                                                            اسماعیل جمیلی