عزیز و حورمتلی هم وطن!

 

دموکراتیک حرکاتیمیزین ذیروه سی, ميلی حؤکومتیمیزین بو گون- صاباح 60 یاشی تامام اولور. موعاصير آذربایجان تاریخینده اونودولماز و مؤحتشم اولان 21 آذر حرکاتی یولوندا جانلارینی قوربان وئرنلرین خاطيره سینی عزیز سانیر, باشدا اونلارین یاديگارلارینی- جانلی تاریخ اولان اينسانلاریمیزی سالاملاییر, ميلی حؤکومتیمیزین 60 یاشی موناسيبتی ایله هر تک- تکینیزی صمیمی قلبدن تبریک ائدیره م.

ميلی حؤکومتیمیزی یارادانلارین یولونو داوام ائتدیرن شاعیرلریمیزدن اولان بختیار ارشادی نین " منیم آذر انقلابیم! " آدلی شعرینی او تاریخی دؤنمی یاد ائتمک نامینه دقتینیز اوچون تقدیم ائدیره م :

 

              منیم آذر انقلابیم!

 

 بیر گون خالقیم-

                  آزادلیغا یئریکله دی,

 سنی دوغدی.

 سنسه  ییرتیب ظولمتلری,

 بیر یاشیندا  یوز  سنه لیک,

 ظولمی بوغدون;

 چنی  بوغدون.

 دیلسیزایدیم,

              دیللی لشدیم  بیرجه ایلده.

مین ایل ایدی-

               قویموردیلار مللی له شیم,

 مللی لشدیم  بیرجه ایلده.

 سندن اول,

            سندن سونرا

 هئچ گورمه ییب  بو قدر ایش,

 گوتورمه ییب  بو قدر یوک-

                               انقلابلار.

 باخیب سنه حیرت ائتدی,

 سندن یاشلی انقلابلار;

 سندن بویوک انقلابلار.

 خالقا یئنی آد  گه تیردین;

 آغیزلارا  داد  گه تیردین.

 منیم حیرت,

             منیم غیرت,

                         منیم هنر انقلابیم!

 مرد  طالع لی,

                 سرت طالع لی,

 منیم آذر انقلابیم!

 

 بویوک خالقیم هاردا ایسه,

 بیر بالاجا  سحو ائله دی.

 فرصت تاپیب دوشمن سنی

 بیر یاشیندا  محو ائله دی.

 عذابلاردا  قوورولمادین;

 آغریلاردان باغیرمادین.

سن هئچ کیمی-

               کومه یینه چاغیرمادین.

 منیم حیرت,

             منیم غیرت,

                           منیم هنر انقلابیم!

 مرد  طالع لی,

                 سرت طالع لی,

 منیم آذر انقلابیم!

 

غم ائله مه,

            امیدینی کم ائله مه.

بیر گون سنی بوغانلاری,

وارلیغیندان قورخانلاری,

                            بوغار خالقیم!

صاباح سنی باشقا آد دا,

باشقا اود دا-

               دوغار خالقیم!

منیم حیرت,

             منیم غیرت,

                         منیم هنر انقلابیم!

 مرد طالع لی,

                سرت طالع لی,

 بیر  یاشلی  ار انقلابیم!

منیم آذر انقلابیم!