گله جک بیزیمدیر

                                                 (  قورتولوش شهیدلرینین خاطره سینه اتحاف)

تاریخدن سیلینمز بابک قانیدیر

آزادلیق یولوندا تؤکولور بو گون

آسلانلار باغیریر من تورکم هارای

ظولمون قورقوسودور سؤکولور بو گون

تورک ائلینین هاراییله  گوجویله

قورتولوش هاواسی اسیر وطنده

آپارتایدین  شووونیزمین کؤکونو

میللتین  یوروشو  کسیر وطنده

اؤلدو واردیر دوندو یوخدور بو یولدا

گله جک بیزیمدیر  بیزیمدیر ظفر

قریلان زنجیردیر ییخیلان زیندان

باتان قارانلیقدیر  آچیلان  سحر

اوزو قانلی باشی اوجا بابکلر

آزادلیق یازینین مژده سین وئریر

یارالی قوینوندا آنا تورپاغین

شرف بایراغیدیر  نسیمله اسیر

شهیدلرین خاطره سی سیلینمز

ساوالان دوردوقجا یاشایاجاقدیر

اؤزگورلوگون یئنیلمه ین سئوگیسی

سولماییب سؤنمه ییب هپ قالاجاقدیر

اسماعیل جمیلی