۲۱ آذر حرکاتی ملی دموکراتیک مبارزه میزین تاریخینده بیر پارلاق اولدوز کیمی ایشیق ساچماقدادير!...

21 آذر حرکاتى‌نین غلبه سیندن سونرا, شمسی 1324- نجی ایلده آذربایجاندا یارانان ملی حکومتین ایلدؤنومو یاخینلاشیر.

او گونلر آذربایجان ملی حکومتی, ستارخانین رهبرلیگی ایله غلبه چالان مشروطیت و او قیامین دوامی کیمی شیخ محمد خیابانی نین رهبرلیگی ایله یارانان آزادیستان حکومتی نین ایستکلرینه دایاناراق برپا اولونموش و آذربایجانلیلارین بوتون جانفشانلیقلارینا رغما بیر ایلدن سونرا عینا مشروطیت و خیابانی حرکاتی کیمی تهراندان گؤندریلن اوردو و یئرلی مرتجع لرین واسیطه سیله قان دریاسیندا بوغولموش و مغلوبیته اوغرامیشدير.

آذربایجان ملی حکومتی مغلوب اولسا دا، اونون نائلیتلری و درسلری ايندى ‌ده خالقیمیزین گونده لیک حیاتی و مبارزه سینده یاشاماقدادیر. بوگون آذربایجان خالقی و ایران تورکلری گینه ده 21 آذر حرکاتى‌نین ایستکلرینی بیر آغیزدان باغیرماقدادیرلار.

مشروطیت انقلابی‌نین رهبرلری، آذربایجان ایالت انجمنینی یاراتماقلا، آذربایجانلیلارین رفاه و کولتورل گلیشمه لری اوچون آذربایجاندا یئرلی بیر دؤولتین اولماسى‌نین ضرورتینی باشا دوشموشدورلر. بو گون ایراندا تورک ملتی نین ایستکلرینی حیاتا کئچیرمک، آذربایجاندا بیر ملی حکومتین یارانماسی ايله شرطلنير.

آ.ف.د.ح. فيکرينجه، آذربایجان ایالت انجمنی، آزادیستان حکومتی و اونلارین داها ملی- دموکراتیک بیر فورمدا دوامچی‌سی کیمی اولان آذربایجان ملی حکومتین تجربه لرینی نظرده آلاراق، ملتیمیزی شوونیست، باسقيچى و پان شیعی بیر رژیمین اسارتیندن قورتارماق اوچون، بیر ملی حکومتین داها مدرن و 21 بیرینجی عصره لایق بیر شکیلده یارانماسینی طلب ائديلمکده دیر.

بیز ملتین آزادلیق پروسسی اولدوقجا مشقتلی و او ملتدن ایللر بویو جانفشانلیق و فداکارلیق طلب ائتمه‌سينه اينانيريق. عین زاماندا، بئله بیر آرزو و ایستگی حیاتا کئچیرمگه بوتون مسقل ملی قووه لرین بیرگه فعالیتی‌نين ضرورليگی ده آيدين‌دير.

آذربایجان ملی حکومتی‌نین ان بؤیوک نائلیت‌لریندن بیری آنا دیلیمیزده تحصیل آلماق اولموشدور، بو، هله گينه‌ ده بو گون آذربایجانلیلار و ایران تورکلرى‌نین اساس باشليجا ایستکلریندن بیری ساییلیر.

آذربایجان فدرال دموکرات حرکاتی, آدی و خاطره سی هر زامان خالقیمیزین یادداشتیندا یاشایان مير جعفر پیشه وری‌نین رهبرلیگی ایله یارانان ملی حکومتین دوامچیلاریندان بیری کیمی، بو گون او شانلی و پارلاق گونلردن یاد ائده رک، ایراندا دینچی، شوونیست و باسقيچى رژیمین اسیری اولان ملتیمیزین آزادلیغی اوغروندا مبارزه نی دوام ائتمکده دير.

چوخ ميلتلى ايراندا، بير ميلت اؤزو تک باشينا ظليم رئژيمه باتا بيلمز. بونا گؤره آيرى دمكرايتك قوه لرله، او جمله دن قادينلار، ايشچيلر، اؤيرنجى حرکاتى و ساير ملت لرين آپارديغى موباريزه‌لرده آکتيوجه سينه ايشتيراک ائتمه‌لى و او اونلارلا البيرليک، ايش بيرليگى و امکداشليق ائتمه‌لى‌ييک. بو ايستکلر بيزيم ده ايستکلريميزدير. بونونلا بيرليکده اؤز ايستکلريميزى‌ده ايره‌لى سورمه‌لى‌ييک. ايندى ايراندا گئدن حرکاتدان آکتيوجه‌سينه حمايت وقارشيليقلى البيرليک ملى حقلر اوغروندا مبارزه‌ميزين طالعينده و گله‌جگينده چوخ اهميتلى رول اوينايير.

 

آ.ف.د.ح. بو گون 21 آذر حرکاتى‌نین ایلدؤنومونده، بوتون ملی قووه لری، ملتیمیزین ان عاجیل ایستکلرینده ن بیری اولان بیرینجی کلاسدان، یونیورسیته یه دک آنا دیلینده تحصیل آلماق طلبی اطرافیندا توپلانمالارینین اهمیتينی بیر دفعه ده وورقولاماق ایسته ییر. بو گون ایراندا بئله بیر ایستگی حیاتا کئچیرمک اوچون یوزمینلر انسانی سفربر ائتمگه داها الوئريشلى شرايط حاضیرلانمیشدير. اؤز ايستکلريميزى ساخلاقلاياراق باشقا قاباقجيل قوه‌لرين آپارديقلارى مبارزه‌دن حمايت ائديب اونونلا البيرليک ائتمک گرکير.

ملتیمیزین طالعى‌نین قئيدينه قالان هر بیر ملی قووه، بوتون دوشونجه آيريليقلارينا و باخیش فرقلرینه رغما بئله بیر ایستکین اطرافیندا توپلانا بیلرلر. بيز بونا اينانيريق. قوی شانلی 21 آذر خاطره سی، ملی حقلر اوغروندا مبارزه ائده ن قووه لری بیرگه هدفلری الده ائتمک اوچون بیر آرایا گتیرسین.

یاشاسین آذربایجان ملی حکومتی نین شانلی خاطره سی!

عشق اولسون 21 آذر حرکاتینین اوغروندا جانلارینی فدا ائدن آذربایجان ائولادلارینا!

عشق اولسون ايرانين قادينلار، ايشچيلر، اؤيرنجى حرکاتى و ملت لرين آپارديغى موباريزه‌لرده آکتيوجه سينه ايشتيراک ائتمگه!

آذربایجان فدرال دموکرات حرکتی!

تاریخ: ۹ دکابر ۲۰۱۸- ۱۹۹۷-جى ايل، آذرين ۱۸