آمريکا سسى راديوسوندان:

دوکتور على قره جه لو ايله موصاحيبه

چهارشنبه ۱۳ آبان ۱۳۸۸ - 4 نوامبر 2009

تاپدیق فرهاداوغلو

 

هارای پروقرامی‌نین قوناغی ایران آذربایجانی فدرال دموکرات حرکاتی‌نین ایجرائيه هئیاتی‌نین عضوو علی قره‌جه‌لو ‌دیر. او، رئداکسیامیزین ایراندا آزلیق‌لارین حقوق‌لارینا دایر سوال‌لارینی جاوابلاندیریر.

 

سوال: ایراندا اینسان‌لارین، خالق‌لارین دیل‌لری ایله باغلی وضعیت نئجه‌دیر؟ هر بیر خالق اؤز دیلینده یازیب اوخویا بیلیرمی؟

 

جاواب: خئیر، ایراندا فارس دیلی رسمی دؤولت دیلی‌دیر. اوندان باشقا هئچ بیر حاق تانینمیر. اؤلکه‌ده یاشایان فارس خالقین‌دان باشقا هئچ بیر میللت اؤز دیلینده مکتبده اوخویا بیلمیر. آنا دیلینده نه قزئت، نه تئلئکانال وار. هئچ بیر شئی یوخ‌دور و 60 ایلدیر کی وضعیت بئله‌دیر.

 

سوال: خالق‌لار نه اوچون اؤز ایستک‌لرینه نایل اولا بیلمیر؟ بو ایسته یی حکومت نه اوچون وئرمیر؟ سببی ندیر؟

 

جاواب: حکومت هر حالدا دوشونور کی، اگر بو حاق‌لاری آذربایجان‌لی‌لارا و یا عرب‌لره و یا کوردلره وئرسه، ایران بؤلونر. حالبوکی، دیل حاقی دموکراتيک بیر حاق‌دیر. اگر ایراندا دیل حاق‌لاری تانینسا، ایرانین میللی بیرلیگی داها گوج‌لو اولار. ایران هئچ واخت بؤلونمز. تک دیل حاقی دئییل، طلب اولونان بیر چوخ دموکراتيک حاق‌لار وار. ساده‌جه دیل بونلارین ایچینده ان موهومودور. اگر بو حاق تانینماسا، ایراندا گله‌جک هر جور تهلوکه ایله قارشی‌لاشا بیلر. 60 ایلدیر ایراندا رسمی ایدیولوگیا بئله‌دیر: ایراندا بیر دیل وار، بیر میللت وار و بیر ایرق وار. ایران دؤولتی ایستر شاه زامانیندا اولسون، ایسترسه ده ایسلام رئسپوب‌لیکاسی زامانیندا اولسون، بو ایدئولوگیا اوزرینده قورولوب.  بیز فدرال دموکرات حرکاتی اولا‌راق، هئچ واخت ایرانین بؤلونمه‌سینی و آذربایجان‌لی‌لارین ایران‌دان آیریلماسینی ایستمیریک. اگر بو دموکراتيک حاق‌لارین ایران داخیلینده تانینسا، بیز داها گوج‌لو اولاریق.

 

سوال:  سیز اینانمیرمیسینیز کی، نه واختسا ایراندا دموکراتيک حکومت اولوب، سیزین دموکراتیک حاق‌لارینیزی وئره‌جک؟

 

جاواب: خئیر، من بونا کسین‌لیکله اینانمیرام. چونکی ایراندا 30 ایله یاخین‌دیر ایسلام رئسپوبلیکای فعالیت گؤستریر. آز دا اولسا حاق‌لاریمیز آنایاسا دا تانینسا دا، بو 30 ایلده ایسلام رئسپوبلیکاسی حتی اؤز آنا یاساسی‌نین بیزه تانیدیغی مینیموم حاق‌لاری تانیماییب و اونو حیاتا کئچیرمه‌ییب. دفعه‌لرله تشببوث‌لر اولوب. ضیا‌لی‌لاریمیزا دئییب‌لر کی، کیتاب‌لارینیزی، درس‌لیک‌لرینیزی حاضیرلایین. همیشه تبلیغات اولوب، آنجاق هئچ واخت ایش گؤرولمه‌ییب