آذربایجان فدرال
دموکرات حرکاتینین
دونیا قادینلار
گونو موناسیبتیله
بیلدیریشی
بو ایل 8 مارت گونو، قادینلارین اؤز موقددراتینا صاحب اولماق، ايجتيماعى و سیاسی حیاتدا آکتیو یئر آلماق و کیشیلر ایله ائشیت حاقلارا صاحب اولماق اوچون باشلاتدیقلاری موجادیله 100 ایلدن آرتیق سورور.
8 مارت، دونیا قادینلار گونو قوتلامالاریندا، بو موجادیلهنی باشلادان، اونو دوام ائتدیرن، قادینلارا اعمال اولونان ائشیتسیزلییه(برابرسیزلییه) ، حاقسیزلیغا و ظولمه قارشی موباریزه ائدنلر آنیلیرلار. آیریجا سورعتلئ دییشن دونیادا یعنی گلیشن ايقتيصادى، ايجتيماعى و سیاسی دورومدا یعنی حاقلار الده ائتمک اوچون موجادیله گئدیر.
1857 جی ایلده قادینلار York New نيویورکدا آشاغی اوجرتلره، اوزون چالیشما ساعاتلارینا، غئیری اینسانی شرایطده چالیشماغا اعتراض ائدهرک قادین حاقلاری ساواشینی باشلاديلار.
ایلک اولاراق کوپئنهاگ‘دا 27 آگوست 1910 دا دوزنلهنن قادین سوسیالیست اينترناسیونال توپلانتیسیندا آلمانلی سوسیالیست، کلارا زئتکین 'قادین گونونون‘ تانیتیلماسی و قوتلانماسینا داییر وئردیگی تکلیف توپلانتیداکیلار طرفیندن قبول ائدیلدی. کوپئنهاگ توپلانتیسيندان سونرا ایلک دفعه 19 مارس 1911 ده آووستوریا، دانیمارکا، آلمانیا و ایسویچرده بیر میلیوندان یوخاری قادین و کیشی فرقلى یوللارلا 'قادین گونونو قوتلاديلار. بیرلشمیش میللتلر تشکیلاتی، 1975 ایلینی 'دونیا قادینلار ایلی اعلان ائتدی و 16 دئسامبر 1977 ده 8 مارتین، بوتون قادینلار اوچون 'دونیا قادینلار گونو اولاراق قوتلانماسینا قرار وئریلدی. بو دوشونجهنین تمل داشی و ایلک آماجی قادینلارین اؤز موقددراتینی تعیین ائتمه حقينه صاحب اولمالاریدیر.
مودئرن و دموکراتیک توپلوملارین ایلک شرطی او توپلوملارداکی قادینلارین اؤز قدرلرینی تعیین ائتمه حقينه صاحب اولماق، یعنی آکتیو اولاراق ايجتيماعی، مدنی و سیاسی یاشامدا یئر آلمالاری و سؤز صاحبی اولمالاریدیر.
ايجتيماعى، ايقتيصادى و سیاسی باخيمدان گئری قالمیشلیغین اؤنملى بیر ندنی قادینلارین بو ساحهلرده آکتیو اولمامالاریدیر. هر اینسانی توپلوم قادین و کیشیدن تشکیل اولور. بونلارین یاریسینین فعال و دیگر یاریسینین غئیری فعالل بوراخیلمالاری او توپلومون فلج و خسته بیر دورومدا اولدوغونو گؤستریر.اگر بیر توپلومدا یالنیز بیر جینسیت گلیشمه و چاغا اویغون حرکت ائدیب و دیگر جینسیت بونلاردان محرومسا او توپلوم گئتدیکجه گئرییه دوغرو ایلهرلییهجکدیر.بونون ان جانلى مثالی ایران توپلومودور.
ایراندا جینسی آپارتاید و قادینلارین تحقیر ائدیلمهسی ایران ایسلام جومهوریتینین دونیا گؤروشونون تملىدیر و بو اساسدا ایران ایسلام جومهوریتینین آنایاساسی آچیقجاسینا جینسی آپارتایدا رسمیت و قانونیت وئريبدیر. توپلومون بوتون ساحهلرینده قادینلار ایکینجی درجهلی وطنداش حساب اولورلار.اؤزلليکله ایسلام جومهوریتینین مدنی و قضایی قانونلاریندا قادینلار بؤیوک اؤلچوده حقسیزليکلره معروض قالمیشلار. بونونلا بیرلیکده آذربایجان تورک قادینلاری میللی کينليکلرينه گؤره ایکی قات داها چوخ ظلمه و سیتمه معروض قالیب توپلومدا دؤردونجو درجهلی وطنداش حساب اولورلار و بو دا قادینلارین سیاسی، ايجتيماعى و ايقتيصادى دورومونو بؤیوک درجهده ائتکىلهيير. مثال اولاراق اؤز آنادیللرینده تحصيل آلمامالارینین نتيجهسينده آذربایجان تورک قادینلارینین ايچينده ساوادسیزلیق درجهسى جوخ یوکسکدیر. بو اساسدا قادینلار اکونومیک و ايجتيماعى باخيمدان جوبران اولونماز چتینلیکلره معروض قالمیشلار.
ایراندا گئری قالمیش بیر توپلومدان و تئوکراتیک بیر دؤولت یاپیسيندان یعنی ایسلام جومهوریسيندن، قادین کیشی ائشیتلیگینین قبول ائدیلدیگی مودئرن بیر توپلوما گئچیش آنجاق بیر چوخ دئوریمله مومکون اولابیلیر. بو دئوریملری ایلک اؤنجه اؤز دونیا گؤروشوموزده و قادینلارا نیسبت اولان اینانجلاریمیزدا یاراتمالىییق. قادینین توپلومداکی یئرینین اؤنمی بیر اؤلکهنین ايرليلهمهسى اوچون باشليجا شرط اولدوغونو اونوتمامالىييق.
ایران توپلوموندا قادین علئيهينه راییج اولان عنعنهلر، گلهنکلر، ائو و مدرسه تعليم تربيه سیستئمینه حاکيم اولان گئری قالمیش دوشونجهلر دوام ائدنه دک بو توپلومون مودئرن و گلیشمیش توپلوملار سیراسیندا یئر آلماسی مومکون دئییلدیر. بو یازيلى و شيفاهی دوشونجهلری اورتادان قالدیرمانین تک یولو حاکم سیستئمی و بو دوشونجهلرین و اینانجلارین وارلیغینی تثبیت ائدن آنایاسانی تمامن اورتادان قالدیرماقدیر.
توپلومون بوتون ساحهلرینه کؤک سالمیش بو گئری قالمیش ذهنیتله موجادیله ائتمک، قادینلارلا کیشیلرین ائشیت حقلره صاحيب اولمالارینین توپلومون ایچینده منیمسنمهسی و یئرینی آلماسی مودئرن بیر مدنیتین اساسیدیر. اینسانی حقلریمیزه گلیشمیش و مدنی اؤلکهلرین سوییهسینه یئتیشمهمیز آنجاق قادینلاریمیزین توپلومون ايجتيماعى، ايقتيصادى و سیاسی ساحهلرینده قاتیلیمجی اولمالارییلا مومکون اولابیلیر. اونوتمایاق کی، دموکراسینین اؤنوندهکى ان بؤیوک انگل قادینلارین سیاستدن اوزاق اولمالاریدیر.
آذربایجان فدرال دموکرات حرکاتی بونا اینانیر کی یالنیز اینسان حاقلارینا دایانان سکولار، مودئرن و مدنی قانونلارلا، قادینلاریمیز و بئلهلیکله ده توپلوموموز شریعت اسارتيندن و زنجیریندن قورتاریلابیلیر.
آذربایجان فدرال دموکرات حرکاتی :
-قادینلارین اؤز موقدراتینا صاحيب اولما حقى قادینلارین طبيعى و قانونی حقىدير،
-جومهوری ایسلامیده قادینلارین علئيهينه اولان بوتون قانونلار قالدیریلمالیدیر و ائلهجه ده یازیلماميش و گئری قالمیس عنعنهلرله موباریزه آپاریلمالیدیر.،
- قادین- کیشی برابرلیگینی توپلومون بوتون ساحهلرینده قانونیلشدیرمگى،
- آذربایجان تورک قادینلارینین اؤز موستقیل تشکیلاتلارینی قورماق ضروریتینی،
-قادین سیویل توپلوم قورولوشلارینین قورولماسینی،
-آذربایجان تورک قادینلارینین توپلومون بوتون ساحهلرینده آکتیو و قرار وئریجی بیر شکیلده قاتیلمالاری گرکسینیمینی،
- آذربایجان تورک قادینلارینین اؤز میللی کيمليکلرینی قورویاراق یورد ایچی و یورد دیشی تشکیلاتلارلا ایش بیرلیگی ائتمهلرینی،
-آذربایجان تورک قادینلارینین ایندیکی دورومونا سون قویماق اوچون بیزیم قادینلاریمیز یاشادیقلاری بؤلگهلرده اؤز موستقیل قادین تئسکیلاتلاری وارسا اونلاری گوجلندیرمهلى، اگر موستقیل تشکیلاتلاری یوخسا واختی ایتیرمهدن اونلارین تشکيلينده چابا گؤسترمهليديرلر.
اؤز ایلکهلری اولاراق منیمسهییب و بو حقلری قازانماق اوچون موباریزه ائتمگى، هر آیدین، مودئرن، لاییک، میللی و دموکرات آذربایجانلینین گؤرهوی ساییر.
آذربایجان فدرال دموکرات حرکاتینین ایجراییه هئیاتی
04.03.2011