21 آذر حرکاتی نین 65 جى ایلدؤنومو موناسیبتیله

آذربايجان فدرال- دموکرات حرکاتى نين ايجرائيه هئياتى نين بيلديريشى

«آذربايجان فدرال- دموکرات حرکاتى» توتدوغو پرنسيپلر اساسيندا، اؤزونو ٢١- آذر حرکاتىنين دوامچيلاريندان بيلير!

طبيعى دير کى، دونيا عوض اولوب و داها بيزيم ياشاديغيميز شرايط و وضعيت فيرقهنين تشکيلى و يا ميلى حؤکومتين يارانماسى دؤوره ايله هر جهتدن فرقلنير.

فيرقهنين ايستکلرى و ميلى حؤکومتين سرلؤوحه سينده اولان ايشلرين بير سيراسى زامان اليله آرادان قالديريليب و بير پاراسى داها آکتوئلليگينى الدن وئريبدير. آنجاق ٢١- آذر حرکاتىنين اساس ايستقامتلرى عوموميتله وار گوجيله اؤز يئرينده دورور:

٢١- آذر حرکاتى تورک ديلينى، آذربايجان تورکجهسينى، آذربايجان خلقىنين ميلى کيلمليگىنين تملى کيمى قيمتلنديردى. ٢١- آذر حرکاتىنين باشچيسى س. ج. پيشهورى چوخ ياخشى بيليردى کى، بير خلقى بير ميلت سويهسينه يوکسلتمکده و ميلتلرين اؤز موقدراتينى تعيين ائتمک حقينى الده ائتمکده، ديلين اولدوقجا بؤيوک رولو و اهميتى واردير.

سبب سيز دئييل کى، کئچن يوز ايلده، بوتون فارس شووينيستلرى و ايفراطى ايرانچى ناسيوناليستلر فارس ديلينى گؤيلره قالديريب و ايراندا ياشايان باشقا ميلتلرين ديللرينى ازيب و محو ائتمکدن بير لحظه ده اولورسا بئله غافيل اولماييبلار.

پيشهورى بو حقده بئله يازير:«ديليميز دوشمنلرين بوش ايديعالارينا باخماياراق چوخ گئنيش و غنى بير ديلدير. اونون ريشهسى خلقيميزين قانيندا و اوره گينده دير. بيز اونو آنا سودى ايله اميب، وطنيميزين روحنواز هاواسى ايله تنفوس ائتميشيک. .اونا توهین ائدنلر، اونو تحمیلی ومصنوعی گوسترمک ایستهينلر بیزیم حقیقی دوشمنلريميزدير.» او يازيردى: «آلتى- يئدى ياشيندا تازا ديل آچميش اوشاغا يابانچى بير ديل تحميل ائتمک جينايتدير...آنا ديلينده يازيب – اوخوماغى قدغن ائتمک فرهنگ (ماعاريف) تکامولونون قاباغينى آلماق دئمکدير»

٢١- آذر حرکاتى اصلينده سياسى حاکميته (پهلوى رژيمينه) قارشى بير حرکت ايدى. يعنى ميلى ظولمون آرادان قالديريلماسى و آذربايجان خلقىنين ميلى و فرهنگى حقلرينى ايالتى و ويلايتى انجومنلر شکيلينده الده ائتمک استيقامتينده بيرحرکت ايدى. البته فيرقه نين او گونکو ايالتى و ويلايتى انجومنلر شوعارى و ايستگىنين بوگونکو اتنيک فدراليزم ايستگينه چوخ اوخشارليغى وار ايدى.

٢١- آذر حرکاتى محروم و تاپدالانميش صينيفلرين و موختليف ظولملرين آلتيندا ازيلميش خلق کوتلهلرينين دانيشان ديلى ايدى. بونا گؤره ٢١- آذر حرکاتىنين برنامه سينده و ايقداماتيندا ايجتيماعى عدالته چوخ بؤيوک يئر وئريلميشدير.

٢١- آذر حرکاتىنين دموکراتيک آزادليقلارا و اينسان حقلرينه موناسيبتى او گونه قدر ايران تاريخينده ميثيل سيز ايدى. ايراندا بيرينجى دفعه اولاراق ميلى حؤکومت دؤورونده قادينلارا سئچيب- سئچيلمک حقى وئريلدى و دؤولت اورقانلارينا نظارت ائتمک اوچون محلى سويه لرده شورالار تشکيل تاپدي.

٢١- آذر حرکاتى گئنيش اجتيماعى اصلاحات آپاردى و بيرينجى دفعه اولاراق ايراندا تورپاق اصلاحاتينى حياتا کئچيردى. آذربايجانين ايقتيصادياتىنين اينکيشافى ٢١- آذر حرکاتىنين اساس هدفلريندن بيرى ايدى.

٢١- آذر حرکاتى ايراندا ياشايان ميلتلرله، اوجومله دن کورد خلقى ايله آرخاداشليق قورموش و ايش بيرليگى آپارميشدير.

ايندى، آذربايجان دموکرات فيرقهسىنين يارانماسيندا و ميلى حؤکومتين برپا اولونماسيندا بؤيوک تاثيرى اولان عاميللرين رولو هر جهتدن دگيشيليبدير! بيزيم دؤوران آرتيق 65 ايل بوندان قاباقکى دؤوران دئييل. داخيلى عاميللر دگيشيليب و بينالخلق شرايط بوس- بوتون تغيير تاپيبدير! آنجاق بو تغييرات ايراندا ياشايان ميلتلرين خئيرينه تامام اولوبدور. ايندى دونيا مقياسينداکى دموکرات و قاباقجيل قووه لر، سووئتلر اؤلکهسىنين داغيلماسيندان نه تک ضعيفلنمهييب، بلکه داها آرتيق راق گوجلنيبلر!

سووئتلر اؤلکهسىنين ويجودو و حمايت ائتمهسى، فيرقهنين تشکيلينه و ميلى حؤکومتين يارانماسينا موناسيب شرايط ياراتديسا دا ، ائله بونون اؤزو ده ميلى حؤکومتين داغيلماسيندا و سينماسيندا بؤيوک رول اوينادى!

ايندى آرتيق دونيا مقياسيندا اينسان حقلرىنين تامين ائديلمهسى و تضمين اولونماسى – او جوملهدن « ميلتلرين اؤز موقدراتينى اؤزلرى تعيين ائتمهسى» حقى- رسميتله تانينير!

ايندى بينالخلق و خارجى عاميللرين رولو و تاثيرى موستبيد رژيملرى ديزه چؤکدورمکده و ميلتلرين قورتولوش موباريزه سينده، گئچميشدن داها آرتيق راق دير. بو اؤزو ده ايران تورکلرينين و هابئله ايراندا ياشايان و ميلى ظولمه معروض قالان ميلتلرين موباريزهسينه جيدى تاثير بوراخيب و اتنيک فدراليزمين قورولماسينا الوئريشلى شرايط يارادير.

ايران اسلام جومهوريتىنين سياستلرى و حؤکم سورن سيخينتى- بوغونتو، ابتيدايى آزادليقلارين تماميله تاپدالاماسى، اينسان حقلرينه قارشى يوروتدوگو دوشمنچيليکلر، ايراندا ياشايان ميلتلرين اؤز ميلى حقلريندن محروم ائديلمهسى و موختليف باهانالارلا اونلارى ازمهسى و ايرانين ايچينده و ديشيندا دؤولتين رسمى سياستينه چئوريلميش تروريستى سياست، دونيانين دموکرات و قاباقجيل قووهلرى طرفيندن محکوم ائديليب و ايران خلقلرىنين عاديلانه و حقلى موباريزه لريندن حيمايت اولونور!

١٣۵٧- جى ايلين اينقيلابى، ايراندا بؤيوک دگيشيکليکلره باعيث اولدو. موستبيد و امپرياليزمه باغلى اولان شاه رژيمى دئوريلدى و ٢۵٠٠ ايلليک شاهليق رژيمينه سون قويولدو

لاکين اونون يئرينه گلن اسلام جومهوريتى شاه رژيمى دؤورونده آز- چوخ مؤوجود اولان عورفى آزادليقلارى دا محو ائديب آرادان آپاردى و بوتون ايرانليلارين قانينى شوشهيه توتوب و ١٢- ايماملى شيعه مذهبى اساسيندا بير اسلامى ايدئولوژيک دؤولت ياراتدى.

آنجاق اينقيلابين بير باشقا جهتى ده وار ايدى. کوتلهلر بؤيوک ميقياسدا سياسىلشيب، آزادليق و دموکراسىنين نه اولدوغونو دريندن منيمسهديلر. اونون نتيجهسينده، ميلى ظولمه معروض قالميش ميلتلرين ميلى شوعورو قات- قات يوکسليميشدير!

٢١- آذر حرکاتى دؤورونده آذربايجان دموکرات فيرقهسىنين فعاليتى و ايران تورکلرينين ميلى- دموکراتيک حرکاتى آنجاق آذربايجانين بير حيصهسينده محصور قالميشدى. حالبوکى، بوگون ايران تورکلرينين ميلى- دموکراتيک حرکاتى آذربايجان تورپاقلاريندا محصور دئييل، بلکه ايندى خوراساسن تورکلريندن توتموش ايرانين جنوبو تورکلرينه قدر، ايصفاهان، قوم، ...و نئچه ميليونلوق تهران تورکلرينى بورويوب و هامى ميلى قورتولوش اوغروندا قول- قولا و چيگين- چيگينه وئريب و بير يئرده ايره ليله ييرلر!

ميلى حقلرين الده ائديلمهسى يولوندا بئله بؤيوک بير ميقياسدا حرکاتين ويجودو، ايران تورکلرىنين تاريخينده سابيقه سيزدير!

ايندى ميلى مسالهنى مظلوم ميلتلر آراسيندا مطرح ائدنلر داها بئش اوچ نفر ضييالى دئييلدير! مظلوم ميلتلر آرتيق، کوتلهوى اؤلچوده اؤز ميلى ايستکلرينى و برابرحقلى وطنداش کيمى ياشاماق ايسته ديکلرينى اوجا سسله ديله گتيرمکدن چکينمهييب، بلکه بو حقلرى الده ائتمگه و ايستکلرينى حياتا کئچيرمگه گؤره کونکرت ايشلره ال آتيرلار. اونلار اؤز موستقيل ميلى تشکيلاتلارينى ياراديرلار!

پیشهوری سؤیله ییردی: «ايجتيماعی مسالهلرین حل اولونماسینین ان یاخشی یولو، شوبههسیز کی، سببلری تاپیب اونلاری تحلیل ائتمکدن عيبارتدیر. مساله،هم ده سببلری تاپیب تحلیل ائتمکله قورتارمیر. جمعیت دائما دگیشیر و عوض اولور. زمان و مکان ايجتيماعی مساله لرده اينسانی گیجلددن بؤیوک بیر بلادیر. ايجتيماعی مسالهلری تدقیق ائدن بیرآدام لابدا تاریخین تکامول و سیچرایشینی، زمان و مکانین مؤوجود شرايطینی و اونلارین تاثیرلرینی نظره آلمالیدیر.»

آذربایجان دموکرات فيرقه سینین موسيسلری ده، شرایطی نظره آلاراق فيرقهنی قوردولار وائله جه ده ميلی حؤکومتی یاراتدیلار!

ایندی ایسه آذربایجانین وایران تورکلرینین سیاسی فعالاری وتشکیلاتلاری گرگ فيرقه نین و ميلی حؤکومتین پارلاق عنعنه وسونتلرین گؤز اؤنونده توتاراق، اونون باشاريلارین هميده چاتیشمامازلیقلارین ونوقصان لارین دریندن اؤيرنهرک، بوگونگو وضعیتی و مؤوجود شرایطی نظرده آلماقلا آذربایجان خلقینین وایران تورکلرینین قورتولوش ساواشینی سرانجاما چاتدیرسینلار!

فيرقه نین پارلاق سونتلری نه دئمک دیر:

١- ٢١ آذر حرکاتی و ميلی حؤکومت دیکتاتورلوغا ، ظولمه ،عدالت سیزلیگه و شاهليق قورولوشونا قارشی ايدی

٢-٢١ آذر حرکاتی و ميلی حؤکومت آذربایجان اوچون دموکراتیک فدرالیسم وایران اوچون دموکراسی ایستهيیردی.

٣-٢١ آذر حرکاتی و ميلی حؤکومت سؤز آزادليغينی، ويجدان آزادليغينی، مطبوعات آزادليغينی، توپلانتی و تشکيلاتلانما آزادليغينی، فردی آزادليقلارين تامين ائديلمه سينی اينسانليق و يورتداشليق حقوقونون توخونولماز اساسلاريندان ساييب و اونون يولوندا موبارزه ائديردی.

٤- ٢١ آذر حرکاتی و ميلی حؤکومت جيدی صورتده قادینلارین حوقوقوندان مودافيعه ائدیب و ایران تاریخینده بیرینجی دفعه اولاراق، ميلی حؤکومت دؤرونده، قادینلار سئچیب و سئچیلمه حقینه ماليک اولدولار. حتی آذربایجان نومایندهلرينين ایران دؤولتی ایله موذاکيره لرينده انتخابات قانونو لایحهسی ایله علاقهدار قادینلارین سئچیب وسئچیلمه حقینی مرکزی دؤولته تحمیل ائتديلر.

۵-٢١ آذر حرکاتی و ميلی حؤکومت تورک ديلينی آذربایجاندا رسمی دؤولت دیلی اعلان ائديب و اونون اینکيشافینا هر طرفلی ایمکان یاراتدی.

٦-٢١آذر حرکاتی و ميلی حؤکومت ایراندا یاشایان خالقلارلا دوستلوق وامکداشليغا یول آچدی. او جمله دن تورک میلتی وکورد میلتی آراسیندا دوستلوق وصمیمی همکارلیق قراردادی باغلاندی.

٧-٢١آذر حرکاتی و ميلی حؤکومت گئری قالمیش فئودال وارباب رعییت موناسبتلرینه آذربایجاندا سون قویدی و زحمت آداملارینین یاشایيشلارینی یاخشیلاشدیرماق اوچون بؤیوک آدديملار آتدی.

ایندی ده بو عومومی پرنسیپلر اؤز قووهتینده دورور. ٢١ آذر حرکاتی و ميلی حؤکومتين اينقيلابی و اينسانی سونتلرينه وفالی اولان هر بير آذربايجانلی، تورک ميلتینين و آذربايجان خالقینين باشیاوجاليغين ايستهينلر ايندی ده گرک:

جمهوری ايسلامینین آرادان قالدیريلماسيندان و ایراندا لائیک ودموکراتیک فدرالیزم سیستمینین قورولماغیندان مودافيعه ائتمهليدير!

فمینیزمدن وقادینلارلا کیشیلرین تام حقوق برابرلیگیندن سؤزسوز مودافيعه ائتمهليدير!

ایشچيلرين و زحمت آداملارینین ایستکلریندن واونلارین آزادجاسينا و موستقيل اولاراق سیندیکا قورمالاریندان دايانمادان مودافيعه ائتمهليدير!

تورک دیلینين تورکلر یاشایان بولگه لرده رسمی و قانونی دیل اولماسيندان مودافيعه ائتمهليدير!

ایراندا یاشایان باشقا میلتلرله دوستلوق وامکداشلیقدان مودافيعه ائتمهليدير!

آذربايجان فدرال- دموکرات حرکاتى نين ايجرائيه هئياتى 2010- جو ايلين آذر آيى