مهر آيى‌‌نين بيرى، 1391- جى تحصیل ایلی نین باشلاماسی موناسیبتيیله

آذربایجان فدرال- دموکرات حرکاتی نین بيلديريشى

 

ایرقچی و دینچى دؤلتین آذربایجاندا باش وئرن دئپرمه ( زلزله) اعتناسیزلیغی، بير داها اونون آنتی آذربایجان ماهیتی‌نی آچیقجاسینا اورتایا قويدو. کیفایتسیز دؤلت دئپرم قوربانلارينا یاردیم ائديب و ییخیلان ائولری و کندلری دوزلتمک یئرینه، خلقين گؤندرديگى کومکلرين قاباغينى آليب و ایمدادچی‌لارین بیر پاراسينی حبسه سالميشدیر.

بو ايلکى تحصيل ايلى بئله بير شرايطده باشلانير.

«آموزش و پرورش» قورومو ايرانين ان بؤیوک ایجتیماعی قوروموساييلير. بو ایل بیر میلیون اوچ یوزمين نفردن – بیر میلیون دؤرد یوزمين نفره یاخین بیرینجی کیلاس شاگیردلری درس کیلاسلاریندا حاضیر اولاجاقلار. گئچن ایللرین آمارینا (ايستاتيستيک) گؤره، شاگیردلرین ساییسی بو ایل 14 - 15 میلیونون آراسیندا اولاجاقدیر.

ائديلن تخمينلره گؤره، شاگیردلرین يوزده آلتميش بئشى‌نين (65% ) آنا ديلى‌سى فارس ديلى دئييلدير.

بیرمیلیون یوزمین نفر ايشچى و موعلیم ایران «آموزش پرورش» قوروموندا ايشله‌ييرلر. درس کیتابلارينین چاپ ایشلری ایله و یازی وسایطی ایله مشغول اولان و گئچیملری «آموزش پرورش» قورومونا باغلی اولان مؤسيسه لرده و صنایعلرده ایشله‌ینلری ده سايا سالساق، «آموزش پرورش» قورومونون رولو و اؤنمی اورتایا چیخار. بئله‌کى، ایران ایقتیصادياتى‌نين هیچ بیر شؤعبه سی‌نين بو قده‌ر آغیرلیغی و ایجتیماعی گوجو يوخدور، و حاکیم رژيمين ایرقچیلیغی و مورتجع‌ليگى ده هیچ بیر ایجتیماعی حوزه‌ده بئله سرت و گؤزه‌چارپان دئييلدير.

ایرقچی دوشونجه لر و عمللر «آموزش پرورش» قورومونا حاکيمدیر. بو قوروم غئیری فارس میلتلری او جومله‌دن و اؤزللیکله ایراندا یاشایان تورکلری آسیمیله ائتمکده و کیملیکلرینی محو ائتمکده ده اساس رول اویناییر. ایسلام جومهوریسی‌نین ایرقچی و ایرتیجاعی «آموزش پرورش» قورومونا فیشار گتیرمک و اونو ایفشا ائتمک، آذربایجان میلی دموکراتیک حرکتی فعاللارینین واز گئچیلمز وظیفه لریندندیر.

حاکیم ایرقچی و آپارتاید رژيمله موباریزه ائتمک اوچون آرديجيل، دواملی- دؤزوملو و تشبوثلى اولماق گرکیر. مهر آیى‌نین بیری آنا دیلینده تعلیم تربیه ایستگينی اير‌لى سورمک اوچون ان اویغون گوندور. اینسان حقلرینين باشليجالاريندان بيرى آنا دیلینده تعلیم تربیه آلماق حقى‌دير. بو دا ایرانين غئیری فارس میلتلری اوچون وطنداشلیق حقی حؤکمونده‌دير.

بو حقى الده ائتمگه گؤره، سیویل ایطاعتسیزلیک موباريزه‌سى متودوندان گئنیش و یارادیجی شکیلده ایستیفاده ائتمه‌لى‌ييک. آنا دیلینده تعلیم تربیه آلماق و ميلى کيمليگينى قوروماق مساله‌سى ایران خلقی‌نین ميلى ظولم بويوندوروغو آلتيندا ياشايان چوخونلوغونون واز گئچيلمز ايستگى‌دير.

بو اورتاق ايستگين قابارديلماسى و اؤن جرگه‌يه گتيريلمه‌سى اوغروندا ائديلن تشبوثلر، گنیش خلق کوتله سی‌نين موباريزه‌ده ايشتيراک ائتمه‌سينى تامين ائده‌بيلن بيچيمده اولماليدير.

باشقا طرفدن ده بو تشبوثلر تاثيرائديجى بيچيمده اولمالی، ایسلام جومهوریسینه گرکن فیشاری گتیره‌بيلمکله بین‌الخلق اورقانلارینین و افکاری عومومی نین دیقتينی اؤزونه چکه‌بيلمه‌لیدیر.

آذربایجان میلی دموکراتیک حرکتی‌نین تشکیلاتلاری و فعاللاری بو قونودا چوخ چئشیدلی ودگرلی ایبتیکارلارگؤسترمیشلر. مهرآيى‌نين بيرينجى گونونده درس کیلاسلارینا گیتمه مک ... و «اؤز دیلینده مدرسه اولمالیدیر هرکسه!» بنزر شوعارلارين وئريليب- ياييلماسى بونلارین اؤرنکلریدیر.

يئری گلميشکن ايران خلقی‌نين ديل باخيميندان چئشيدلی‌ليگينه و ميلی باخيمدان چوخ ميلتلی‌ليگينه اينانان بوتون فارس ديللی ضياليلاردان طلب ائدیریک مدرسه‌لرين آچيليشی موناسبتی ايله ، آنا ديللری فارسجا اولمايان ميلتلرين ديللرينين رسمی تانينماسی ايستگينی و آنا ديلينده تحصيل آلماق حقينی، عملده- واقعی صورتده مودافيعه ائتسينلر!

اينديکی زاماندا آنا ديلينده تحصيل آلماق، بوتون اينسان حقلری موقاويله‌لرينين وورغولاديغی طبيعی بير مساله دير و دونيا اؤلکه‌لرينين چوخوندا آناديلينده تحصيل آلمانين رسمی اولاراق تانينماسی ديقته لاييقدير. آنجاق 21-جی يوزايلين باشلانقيجيندا، ایران رژيمى، اوشاقلارين آناديلينده تحصيل آلماسينی رسمی تانيماماقدا، قارا بير اؤرنک کيمی گؤزه چارپماقدادير. حالبوکی، فارس ديلی ايرانلی اوشاقلارين چوخونلوغونون، يانی يوزده آلتميش بئشی(%65) نين آنا ديلی‌ دئييلدير.

ایسلام جومهوریسی غئیری فارس میلتلرین آنا دیللرینده تعلیم تربیه آلما ایستکلرینه بویون قویوب  و فارس ایرقچی و شوونیستی سیاستلریندن واز گئچمه‌لیدیر. ایران ایسلام جومهوریسى‌نین اریتمه (آسيميلاسيون) و غئیری فارس دیللرینی یوخ ائتمه چابالارينین گله‌جگی اولماییب، فارس ميلتى ايله غئیری فارس میلتلرينین آراسیندا میلی نیفرت ياراتماقدان باشقا سونوجو اولمایاجاقدیر.

مئديالاردا وئريلن راپورتلارا گؤره، زلزله‌يه اوغراميش بؤلگه‌لرده ياشايان يورتداشلاريميز، فارس ديلينى بيلمه‌ديکلرينه گؤره تورک ديلينى بيلمه‌ين يارديمچيلارلا علاقه قورا بيلمه‌ييرلر. آيدين‌دير کى، فارس دیلی آذربایجاندا رسمی دیل اولابیلمز. آذربایجاندا رسمی‌ديل و دؤلت دیلى آنجاق آذربایجان تورکجه سی اولمالیدیر.

آذربایجان فدرال دموکرات حرکاتی بوتون ضیالی درنکلرينى، ميلى چاليشقانلارى، اؤیرنجيلری و سیاسی گوروپلار ی ایراندا آذربایجان تورکجه‌سی‌نین رسمی‌لشمه‌سی و تعلیم تربیه‌نین آنا دیلینده اولماسی اوچون ایش بیرلیگینه چاغیریر. آذربایجان فدرال دموکرات حرکاتی اؤز نؤوبه‌سینده یوخاریدا ساییلان آماجلارا یؤنه‌لیک آذربایجانین باشقا درنکلر، گوروپلار، جمعیتلر و شخصیتلرى ایله امکداشليغا حاضیردیر.

آذربايجان فدرال- دموکرات حرکاتی، ايراندا مؤجود اولان ميلی مساله‌نی تمامأ سياسی بير مساله کيمی تانى‌يير! بو مساله‌نين کؤکوندن حل ائديلمه‌سی، ايراندا دؤلت ايقتيدارينين ميلى- ائتنیک و فدرال دؤلت بيچيمينده اولوشماسی، ميلی مجليسلرين و او جومله‌دن آذربايجانين ميلی مجليسی‌نين قورولماسيندان آسيليدير.

19 سپتامبر 2012

شهريور 1391

آذربایجان فدرال دمکرات حرکاتی ایجرائیه هیئاتی