8- مارت قادينلارين بين الخلق همرايليک گونو موناسبتیله

ايسلام جمهوریتی قادینلارین قدار دوشمنی دیر!

قادينلارلا کيشيلرين حوقوق برابرليگى بوتون سياسى-ايجتيماعى و ايقتيصادى ساحهلرده تامين ائديلمهليدير. بوتون حاکيميت اورقانلاريندا قادينلارين ايشتيراکى، اونلارين نوفوسونون سایی ایله موتناسيب اولماليدير! گئرچک حياتدا موجود اولان برابرسيزليگى آرادان قالديرماق اوچون لازيم تدبيرلر، او جوملهدن قادينلارين خئيرينه موثبت تبعيض حياتا کئچيريلمهليدير! زحمتکش عايلهلره منسوب اولان قادينلارين گليشمهسى اوچون الوئريشلى شرايط يارانمالى و بوتون قادينلارين موستقيل اولاراق تشکيلاتلانمالاريندان حيمايت اولونماليدير!

(آذربایجان فدرال ـ دموکرات حرکاتینین پلاتفورموندان )

1) ايراندا حؤکم سورن «جينسی آپارتايد» ايسلام جومهوريتینين دؤولت ایدئولوژيسینین تمل داشلاريندان ساييلير. بو دؤزلمز وضعيته سون قويماق و قادينلارين آزاد اولماسی، ايسلام جومهوريتینين آرادان قالديريلماسی ايله سيخ علاقهده دير.

بو او دئمک دئييل کی، رژيمين آرادان گئتمهسيله قادينلار آزادليغا چاتاجاقلار، آنجاق رژيمين مؤوجوديتی ايله باغلی اولان بير سيرا آيری سئچگيليکلر و تحقير- تؤوهينلر، «قانونی لشميش» حقسيزليکلر محو اولوب و قادينلارين هرجهتدن «کيشيلرله» برابر حوقوق اولمالارينا و تام آزاد اولمالارينا يول آچيلاجاقدير.

2) تاسوفله، بوتون ايراندا و اوجومله دن ايراندا ياشايان تورک ميلتینين ايچريسينده، هله ده «پاتريارکاليسم» و «کيشيلرين حاکيميتی» و اسکی ايرتيجاعی سونتلر و دبلر گوجلودورلر! اونلارلا موباريزه ائتمک ميلی آزادليق اوغروندا دؤيوشن بوتون اينسانلارين بورجودور!

3) قادينلارين آزادليغي، ايراندا ياشايان ميلتلرين، ائلهجه ده ايران تورکلرينين آزادليغينا يول آچار! قادينلار آزاد اولمازسا، هئچ توپلوم آزادليق اوزو گؤرمز و دموکراسی آياق توتا بيلمز.

4) ايسلام جومهوريتی يارادان «جينسی آپارتايد» سيستمينی محو ائتمک اوچون، قادينلار اؤز باغيمسيز و موستقيل تشکيلاتلارينی قورماليديرلار. قادينلارين آزادليغينی آنجاق اونلارين « اؤزونو قورتارما حرکاتی» تامين ائده بيلر.

5) آذربايجان ميلی ـ دموکراتیک حرکاتینین مودافيعهچيلری و چالیشقانلاری، تورک قادینلارینین قورتولوشلاری یولوندا موباریزهلرینه و ائلهجه ده اونلارین موستقيل تشکیلاتلارینی یاراتمالارينا یاردیم ائتمهليدیرلر. او بيری ياندان دا، تورک فمنیست قادینلاری آذربایجان ميلی ـ دموکراتیک حرکاتيندا جيدی شکيلده ايشتيراک ائتمهليديرلر! آذربایجان ميلی قورتولوش حرکاتی ایله قادینلارین قورتولوش حرکاتینین ایش بیرلیگی وبیرگه موباریزهسی اولدوقجا اؤنملی دیر!.

آذربايجان فدرال – دموکرات حرکاتینين ايجرائيه هئياتی

٢۰٦-جی ايلين مارتی، ١٣٨٤-جو ايلين ايسفند آيی