تبریزین اؤزوایدی، اؤزو

بهمنین ایرمی دوققوزو!...

تبريزين 29 بهمن قیامی نین شانلی خاطره سینه عشق اولسون!

جنوبی آذربایجان- ايران تورکلرينين موعاصیر تاریخینده، مشروطیت انقلابی عرفه سینده یارانان «آذربايجان ایالت انجومنی»، شئیخ محمد خیابانى نین رهبرلیگی ایله بر پا اولونان «آزادیستان حؤکومتی» و هابئله ميلی- دموکراتیک موباريزه میزین آلنیندا پارلایان «21 آذر حرکاتی» نین نزدینده، «تبریزين 29 بهمن قیامی» مهم بیر یئر توتماقدادیر. 29 بهمن قیامی بیر نئچه جهتدن اهمیته مالیک دیر:

1- سید جعفر پیشه وری نین رهبرلیگی ایله یارانان ميلی حؤکومتین مغلوبیتیندن سونرا، ایراندا اينگلیس دؤولتی نین اؤزباشینالیغینا قارشی باشلانان نفت صنایع سينين ميلی لشدیرمه حرکاتینا 28 مرداد کودتا سی ایله سون قویان محمد رضا پهلوی، دهشتلی ترور و تضییق واسطه سیله بوتون سیاسی، ايجتيماعی و صنفی تشکیلاتلاری محو ائدیب، امریکا و اينگلیس دؤولتلرینین ایسته دیگی کیمی بو منطقه ده بیر «دینجليک آداسی» یاراتمیشدیر.

تبريز ایسه 29 بهمن قیامی ایله بو «دینجليک آداسی» نین نه قدر «دینج» اولماسینی گؤسترمیش و حاکمیتین بو یالان ايديعالارینین بوش اولدوغونو اوزه چیخارتمیشدیر.

2- ایراندا یاشایان باشقا ميلتلر، آذربایجانلیلارین قیامینی اؤرنک توتاراق، بو قیامی باشقا شکیللرده دوام ائدیب و نهایت بهمن اينقيلابی ایله، پهلویلر سولاله سی نین سلطنتینه سون قویوب و بواؤلکه ده بیرینجی دفعه اولاراق جومهوریت اعلان ائتمیشدیلر.

3- رضا خانین سلطنتی ایله دؤولت سیاستینه چئوریلن آریا پرستلیک و فارس شوونیزمی، محمد رضا پهلوینین سلطنتی نین باشلانقیج دؤورونده دوام ائتسه ده، بو سیاست، ميلی حؤکومتین مغلوبیتیندن سونرا آذربایجاندا داها سیستماتیک و داها گوبودجاسینا ایرلی سورولموشدور. ميلی حؤکومتین دؤورونده آذربایجان تورکجه سینده نشر اولونان بوتون غزئت و کيتابلاری- او جومله دن درس کيتابلارینی- خیاوانلاردا یاندیرماقلا باشلانان بو سیاست نتیجه سینده، گئت- گئده آذربایجاندا تورک دیلی و کولتوروندن نيشانه سی اولان هر بیر اثره قارشی تضییق و ترور، دولتین اصلی سیاستینه چئوریلمیشدیر. آذربایجانا گؤندریلن اوستاندارلار و یوکسک روتبه لی مامورلارهر بیر قابلیتدن اؤنجه، آریا پرست و شوونیست اولمالاری شرط اولموشدور. اؤلکه نین دیگر ایالتلرینده نفت صنایع سينی ميلی لشدیرمه دؤورونده یارانان نيسبی آزادلیقدان آذربایجانين شهر و کند لرینده بیر اثر و نيشانه اولمامیشدیر. 1325- جی ایلین 21 آذرینده آذربایجانین بوتون شهر و کندلرینده اعلان اولونان «فوق العاده وضعیت»، بهمن اينقيلابی نین عرفه سینه دک دوام ائتمیشدیر. بو ایللرده حتی نوحه کيتابلارینین آنا دیلمیزده نشر اولونماسینا دا دؤولت نظارت ائتمیش و بیرچوخ حاللاردا اونلارین نشرینه ده قارشی چیخمیشدیر.

بو دهشتلی و قورخونج ایللرده آذربایجان- ايران تورکلرينين ميلی- دموکراتیک آرزولارینی بوشا چیخارتماق اوچون پهلوی رژیمی، هئچ بیر جينایت و تروردان چکینمه میشدیر. رژیمین ميلتیمیزین ميلی- دموکراتیک موباريزه سینه قارشی نه قدر حساس اولدوغونو، اونون کلانتری- ذهتاب و بهرنگی- دهقانی آدلاری ایله مشهور اولان ميلی- سیاسی و کولتورل مرکزلرینی داغیتماق زامانیندا داها آیدین شکیلده شاهید اولموشدوق.

بوتون بو جينایت، ترور و تضییق لره قارشی تبريز خلقى، 29 بهمن قیامی ایله گؤسترمیشدیر کی آذربايجان- ايران تورکلرى تسليم اولماييب، موباريزه ائدير و ميلی- دموکراتیک طلباتیندان ال گؤتورمک ایسته میر.

4- و نهایت 29 بهمن قیامی ایله آذربایجان و ایران تورکلرينین موباريزه سىنین یئنی بیر مرحله سی باشلانمیشدیر. بو مرحله ده ایللر بویو تضییق و ايختيناقدان سونرا، آذربایجانلیلار ميلی- دموکراتیک غایه لرینی حیاتا کئچیرمک اوچون یئنی شیوه لره ال آتمیشدیلار.

29 بهمن قیامیندان سونرا، آنا دیلیمیزده گیزلی شکیلده نشر اولونان بعضی غزئت و کيتابلارلا باشلانان دؤورده، ایکی موختيلف مرحله نی گؤرمک اولار:

اليف: بهمن اينقيلابیندان سونرا اقتدارا گلن ايسلامی حؤکومت، بو اينقيلابین اساس آماللاریندان بیری اولان غئیرمتمرکيز بیر سیاسی- ايداری سیستمىنين یارانماسینا انگل اولوب و غئیر فارس ميلتلرین اؤز موقدراتينى موعينلشديرمک اوغروندا آپارديقلارى موبا ريزه لرينه قارشی، حربی قوه لر واسطه سیله تضییق سیاستینی یوروتموشدولر. ايسلامی حاکمیت بو سیاستلرین واسطه سیله، کوردوستاندا کومله- دموکرات پارتی لرينين رهبرلیگی ایله ميلی حرکتى، ایران تورکمنستانیندا تورکمن شورالاری حرکتینى و اؤلکه نین جنوب بؤلگه لرینده ایران عربلری نین ميلی- دموکراتیک قالخیشلارینی قان دریاسیندا بوغماغا چالیشمیشدیر. بو سیاست آذربایجاندا ایسه، «خلق مسلمان حرکتی» نی گوبود و آمانسيزجاسينا داغيتمیشدیر.

ب: خلق مسلمان حرکتی نین غدارجاسینا یاتیریلماسیندان سونرا، سیاسی شرط لردن آسیلی اولاراق، آذربایجاندا ميلی- دموکراتیک حرکاتى، اؤزونه یئنی فورمالار آلمیشدیر. بو مرحله ده ميلتیمیزین وطن پرور آیدینلاری، اينقيلابدان سونرا یازیلمیش اساس قانونون بعضی ماده لرینه ايستيناد ائده رک، موعین کولتورل حقلری برپا ائتمک اوچون ميلتيمیزی سفربر ائتمگه چالیشمیشدیلار.

بو فعالیتلره قارشی ايسلامی رژیم هر زامان اولدوغو کیمی زيندان و ايشکنجه ایله جاواب وئرمیشدیر.

آنجاق خالق حرکاتی طومار یازماق، کولتورل ییغینجاقلار تشکیل ائتمک و بو کیمی فعالیتلره قناعت ائتمه میشدير. خالق کوتله سی نین ميلی فعالیتیه رغبتی آرتدیقجا گئت- گئده اونون فعالیت دائره سى گئنیشلنميش و «بابک قالاسی حرکاتی» مرحله سینه قدم قویموشدور. بو مرحله دن سونرا خالقین ميلی- دموکراتیک ایستکلری داها دا آیدین شکیلده اورتایا چیخمیش و ایراندا، ديل اساسيندا قورولان فدرال بیر سیستمین یاراديلماسی، گئنيش خالق کوتله سی طرفیندن طلب اولونموشدور.

«بابک قالاسی حرکاتی» ایله ميلی- دموکراتیک موباريزه میز، مضمون جهتیندن یئنی و يوخارى بیر سوييه يه يوکسلميشدير. بو مرحله دن آذربایجان تورکلرينین موباريزه سی یاواش- یاواش ایراندا یاشایان دیگر تورکلرين، او جومله دن مرکز و خوراسان ایالتلرينده ياشايان تورکلرين و هابئله قایشقای تورکلرينین ميلی موباريزه لریله واحید بیر آخینا قووشماغا دوغرو گئتمه گه باشلامیشدیر.

بئله لیکله، ميلی- دموکراتیک موباريزه میزده، ميلی طلباتیمیزین صیقل لشمه سی و آیدین لاشماسیندا 21 آذر حرکاتی اصلی رول اوینامیشدیرسا، دئمک اولارکی، 29 بهمن قیامی دا بیر طرفدن آذربایجانلیلارین کوتله وی شکیلده سیاست مئیدانینا آتیلمالاریندا و دیگر طرفدن ميلی آرزولاریمیزین حیاتا کئچیریلمه سینه مهم مانعلردن بیری اولان سلطنت سیستمی نین داغیلماسیندا عوض سیز رول اوینامیشدیر.

29 بهمن قیامی کئچن یوز ایلده آذربایجان خلقى نین ميلی- دموکراتیک ايستکلر اوغروندا آپارديغى موباريزه سى نين دفترینده یازیلمیش پارلاق صحیفه لردن بيريدير!

آذربایجانليلار و هائیله ایراندا یاشایان بوتون تورکلر 29 بهمن قیامی نین خاطيره سینی هر زامان عزیز توتوب و بو قیامین شهیدلرینی هئچ زامان اونوتمایاجاقلار.

آذربایجان فدرال- دموکرات حرکاتى نين موقتى ايجرائيه هئياتى