آذربايجان فدرال دموکرات حرکاتینين خورداد ميللی قيامینين دؤردونجو ایل دؤنومو موناسیبتییله بیلدیریشی
دؤرد ایل اؤنجه 1385- جی ايلين خورداد آييندا، آذربایجان خلقی وایراندا یاشایان تورک میللتی ميلی ظولمه و تحقيره، آیری سئچگیلیگه و حقسيزليگه قارشی عصیان ائدیب بیرمیللت کیمی مئیدانا چیخدی! ميلی شوعورون يوکسلمهسی، تورکلرين بير ميلت اولاراق اؤز گوجونو گؤرمهسی کيمی نائيليتلر گؤرکملی قيامين گئری قاييتماز نتيجهلريندندير.
خورداد قيامی گونلريندهکی «هارای، هارای من تورکم!» باغيرتيسی چوخلارينين يوخوسونو پوزدو، رئژيم باشچيلارينين جانينی اؤلوم تری چولقالادی.
خورداد قیامی گؤستردی کی آذربایجان میللی حرکتی، بیر بؤیوک ومحتشم ایجتماعی حرکت دیر، اونون گوجو و ایمکانلاری توکنمزدیر!
بو سون دؤرد ایل گؤستردی کی آذربایجان میللی دموکراتیک حرکتی هر گون گلیشمکده و گوجلنمکتهدیر.
ميلتيميزين حقلی موباريزهسينه تؤوطئه آدی قويماق، اونو ازيب، تاپداييب، بوغونتويا سالماق و غئير قانونی آدلانديرماق کيمی گئری قالمیش شيوهلر داها گئچرلی دئییل. طبيعی حقلرينی ايستهين بير ميلتين سسينی اوزون موددتلی بوغماق مومکون دئييلدیر!
ايسلامی رئژيم ، آذربایجانلیلارین خورداد قیامیندان سونرا، وار گوجونو ایشه سالیب آذربایجان میللی حرکاتینین ایچینده داغینیقلیق یارادیب و اختلاف سالسین ! آذربایجان میللی حرکاتی اولدوقجا آییق و ساییق اولمالیدیر!
ميللی قورتولوش ایستگی ايران تورکلرينين و آذربايجانليلارين ايچريسينده دريندن کؤک ساليبدير. ١٣٨۵-جی ايلين خورداد قيامی و گئچن دؤرد ایلده آپاریلان موباریزه لرثابيت ائتدی کی، رئژيمين اویقولادیغی آسیمیلاسیون و آیری سئچکیلیک سیاستی ايستهنيلن نتيجهيه چاتماييبدير.
عزيز وطنداشلار!
ایران تورکلرنين ايستگی، ميللی مسالهنين يئرلی – ديبلی، کؤکوندن حل اولونماسيدير! ميللی ظولمون آرادان قالدیریلماسی دیر! بونون حلی اوچون ميلت اؤز حاکيميتینی قورمالیدیر. بوگون ايران ايسلام جومهوريتی بونا ان بؤيوک مانعه دير.
ميللی ظولمو محو ائتمک اوچون، آذربايجاندا و عوموميتله تورکلرين ياشاديقلاری بؤلگهلرده حؤکم سورن ايقتيصادی گئريده ساخلامالاری دايانديرماق ، ايراندا ياشايان بوتون ميلتلرين اينکيشاف ائتمهسينه برابر ايمکانلار و فورصتلر ياراتماق، جينسی آپارتايدی و قادينلارين تاپدالانماسينی آرادان آپارماق ، زحمت آداملارينين و يوخسول صينيفلرين حقينده ائديلن عدالتسيزليکلره سون قويماق اوچون بویوک ایش بيرليگی گرکیر
موختليف ايجتيماعی و کولتورل صينيفلارين، قيشرلرين و درنکلرين تشکيلاتلانماسينا جيديتله يارديم ائتمک، آذربايجان ميلی حرکات کادرلارينين اساس وظيفه لریندندير.
بوگون آذربایجان میللی- دموکرات حرکاتینین ان اؤنملی ايستکلري بونلاردان عیبارتدیر:
- آنا ياسانين (قانون اساسی) دييشديريلمهسی، ايرانين چوخ ميلتللی بير اؤلکه اولماسینين رسمی تانينماسی، دموکراتيک، لائيک و فدرال جومهوريتين قورولماسی
- دؤولتین هر بیر دیندن و ایدئولوژی دن موستقیل اولماسی، دین و مرام- مسلکین اؤلکه نین تعلیم تربیت سیستمیندن تمامیله آیری اولماسی
- تورک ديلینين رسمی تانينماسی و تحصيلاتين بوتون مرحلهلرينده اونون تطبيق ائديلمهسی،
- تورک ديلينده سرتاسری تلويزيونون تاسيس ائديلمهسی
- قادینلارلا کیشیلرین حوقوق برابرلیگی نین بوتون سیاسی- ایجتیماعی و ایقتیصادی ساحه لرده تأمین ائدیلمه سی. قادینلارین علئیهینه اولان بوتون یازیلی و شفاهی قانونلارین قالدیریلماسی
- بوتون سياسی محبوسلارين او جومله دن سایین سعید متین پورون قئییدسیز شرطسیزآزاد ائديلمهسی، آذربایجان میللی حرکتی نین حبسه آلینانلارینا، اؤلدورولنلرینه، تاپدالانانلارینا مسوليت داشييانلارينین جزالانديريلماسی
- یازی، بیان، دوشونجه و وجدان آزادلیغی نین ایستیثناسیز تامین ائدیلمه سی. بوتون کولتورل، صینفی درنکلرین و سیاسی حیزب لرین فعالیت و گؤستری آزادلیغی، یاسال تامینات آلتینا آلینمالیدیر
- آذربايجانين و تورکلرين ساکين اولدوغو بؤلگهلريندن، پهلويلر دؤورونده و خوصوصن ايسلام جومهوريتینده اعمال اولونان ميللی ظولم و آيری سئچيجيليک سياستی آذربایجان سرمایه سینین کؤچورولمهسينه و ماهير امک گوجونون گئنيش موهاجيرتينه و ایقتیصادیاتینین محو اولماسینا سبب اولموشدور. بو غئيری طبيعی گئديش دايانديريلمالی و تئزليکله اطرافلی ايجتيماعی- ايقتيصادی گئريليگين قاباغی آلينماليدير
تهراندا يئرلشن ايسلامی شورا مجليسی تکجه فارس عرقچیلیغی نین اينحيصارچی منافعينی تمثيل ائدیر. آذربايجانلیلارین ايستکلرينین تامینی اوچون و ميللی ظولمو و آيری سئچيجيليگی آرادان قالدیرماق و يوخاريدا سيرالانان سياستلری حياتا کئچيرمک اوچون، آذربايجانين يئرلی ميللی مجلیسی نین قورولماسی اساس شرط دیر
آذربايجان فدرال دموکرات حرکاتینين ايجراييه هئياتی
–1389جی ايلين اورديبهيشت آيی
12 مای 2010